Hosinkulu ha nwi tiva

Hosi Busa Charles Nxumalo loyi a tiviwaka hi vito ra Hosi Magona u vula leswaku hosinkulu wa rixaka
ra Vatsonga Machangana ha nwi tiva naswona I Eric Mpisane Nxumako yena ntukulu wa hosinkulu Nghunghunyane yena mulwinkulu na vakoloni. Leswi hosi Magona u swi vurile eGiyani Multipurpose Centre laha a ku tlangeriwa ntirho wa lembe na lembe wa Nghunghunyane. Hosi Magona u vurile leswaku rixaka ra Vatsonga Machangana ri ta nkuma nhlonipho lowu nga fanela ntsena loko mfumo wu ri nyikile vuhosinkulu ku fana na tinxaka tinwani. “Vanwana va vula leswaku hi fanele hi vhota ku kuma leswaku I mani hosinkulu eka tihosi ta ka hina,” ku vula hosi Magona a kanetana na swona.

“A hi ta vhota loko a hi nga tivi matimu kambe matimu ya le rivaleni leswaku ntukulu wa Nghunghunyane hi yena a nga fanela,” ku vula hosi Magona. Muchaviseki profesa Muxe Nkondo loyi a yimela Rixaka Heritage Forum u komberile mfumo ku tekela enhlokweni vuhosinkulu bya rixaka.

U komberile tihosi ta Vatsonga Machangana ku seketelana. U tlherile a tivisa lava a tile na vona kusuka eka Rixaka Heritage Foundation ku nga tatana Ernest Khosa ku nga matsalani na tatana Muchuchu Nxumalo ku nga xirho xa Nhlangano. Tatana July Sithole yena u nyikile matimu ya hosinkulu Nghunghunyane. Manana Phophi Ramathuba yena xirhonkulu xa ndzawulo ya rihanyu eka xifundhankulu xa Limpopo u komberile ku tirhisa ndhavuko na matimu ya tihosi to fana na Nghunghunyane ku kurisa no hluvukisa rixaka.