KTC Biography
MATIMU YA MUFI KHAZAMULA THOMAS CHARLES MANGANYI
Khazamula Thomas Charles Manganyi u velekiwile hi ti 23 Khotavuxika 1953 eka Mavambe eka Malamulele, laha sweswi ndzhawu leyi yi yi nga eka Masipala wa Collins Chabane kwala ka Xifundzhankulu xa Limpopo.
A ri n’wana wa vunharhu wa Hatlani Machachuli Manganyi na N’wa Xihalati.
Tidyondzo:
U sungurile ntangha A ku ya fika eka ntangha tsevu, ku nga Std 6 hi ra vadya-nhlampfi eMavambe Primary School. Ku yisa tidyondzo ta yena emahlweni u sungurile Form l hi lembe ra 1972 eShigwedzi Secondary, laha a nga pasa Form III hi lembe 1974. U endlile ntangha khume, Std 10 kumbe Form V hi yexe, leyi namuntlha yi vuriwaka Grade 12 hi 1984. U tlhele a ya University of the North, leyi namuntlha yi tivekaka hi University of Limpopo, laha a nga kuma Bachelor of Arts hi 1991. A engeta hi ku endla Diploma ya Human Resources Management eAllenby In Home Study Campus.
Ntirho:
Hi malembe ya 1975 – 1979 u vile mudyondzisi wo pfuneta exikolweni xa Fikani na Mhinga Higher Primary School.
Hi lembe ra 1979 a ri Mabalane eka SABC – Munghana Lonene hi nkarhi lowu a ya ha ri Radio Tsonga ePieterburg, laha ku tivekaka hi Polokwane namuntlha.
Hi lembe ra 1985 – 1987 u tirhile kwale ka Radio Tsonga (MLFM) tanihi Mupfuneti wa Minongonoko. Hi lembe leri ra 1987 u sukile eka Radio Tsonga.
Hi rona lembe leri ra 1987 u tlhela a ya kuma ntirho tanihi Matsalana eka Ndzawulo ya Vurimi na Swihlahla ehansi ka Holobye JB Mnisi e khale ka tikoxikaya ra Gazankulu. U tirhile kona ku ya fika hi lembe ra 1993.
Ku suka hi 1993 ku ya fika lembe ra 1996, KTC u tirhile eka tindzawulo timbirhi, ku nga Ndzawulo ya Dyondzo na Ndzawulo ya Mitlango, Vutshila na Mfuwo eka Xifundzhankulu xa Limpopo tanihi Senior Language Practitioner
Hi lembe ra 1997 a ri Mupfuneti wa Muhleri (Assistant Editor) eka Language Services eka Huvo yo endla milawu ya Limpopo.
Hi lembe ra 2004 ku ya fika 2013 loko a ta ya ekuwiseni a ri Table Assistant eka House Proceedings eka Huvo yo endla milawu ya Limpopo.
KTC Manganyi u nghenelerile eka ku tshula marito lamantshwa eka Ndzawulo ya Mitlango Vutshila na Mfuwo.
KTC u nghenelerile eka tiprojeke leti landzelaka:
1. HIV & Aids 2013
2. Multilingual Parliament /Political Terminology 2013
3. Mathematics Grade R-6 Dictionary 2013
4. Natural Sciences and Technology Grade 4-6 2013
5. Life Orientation Intermediate Phase February 2016
KTC u nghenerile mimphikizano ya vutsari laha a nga kuma masagwadi.
Eka swa vutsari, KTC u tsarile tibuku na switori
1. Mapapila ya Varhandzani 1981
2. Anganyelani (Mitlango yo koma) 1984
3. N’hwarimbirhi (Ntlango) 1984
4. Swa yila hi 1985 (Novhele) leyi nga hlayiwa eka ntangha 7 (Grade 9) hi 199 – 1993.
5. Hi le Misaveni la’ (Ntlango) 1986 wu tirhisiwile eka Course II’s eUNISA na UNIVEN
6. Emalembeni ya magidimbirhi n’wana kokwana (mitlango yo koma) 1987. Buku yi kumile sagwadi ra xiyimo xo sungula eka mphikizano lowu endliweke hi va Xitsonga Language Board
7. Homa yi be tsolo (ntlango) 1989
8. Ndhasundhasu wa miehleketo (ntlango wa xiphemu xin’we) hi 1990. Ntlango wu kume xiyimo xa vumbirhi eka mphikizano wa va ka Shuter & Shooter ekhale ka tikoxikaya ra Gazankulu.
9. A mi si vona nchumu (Novhele) 1989
10. Garingani (Folklores) hi 1989. Buku yi kumile xiyimo xa vunharhu eka mphikizano wa va ka Readwell kona ekhale ka tikoxikaya Gazankulu.
11. A hi dyeni vongwe (Folklores) 1996
12. Mutivi wa ndlela i mufambi wa yona (ntlango)
13. A swi lavi wena (Novhele)
14. Kwembe ro hiwa (Nhlengelo wa mitlango yo koma)
U tsarile mintlangu no tlanga mintlangu yo hlaya, leyi nga haxiwa eka Radio Tsonga leyi sweswi yi vitaniwaka Munghana Lonene. Yin’wana ya mintlangu leyi a nga yi tsala hi leyi:
1. N’wananga u ndzi lamulerile 1980
2. Kwembe ro hiwa ari na murhu – wu winile sagwata ra matsalele ya mintlangu wa
Radio wa xiyimo xa le henhla hi mintirho ya ka SABC hi 1981
3. Va ri… 1982
4. I vusopfa bya mina 1983
5. Va ta va va mina? 1984
6. U nga chavi 1984
7. U hlamala yini?
Radio Tsonga Drama Record Broadcast 1985
8. Cukumetani
Radio Tsonga Drama Record broadcast 1991
9. A ku na nchumu
Munghanan Lonene Drama Record broadcast 1999
Loko a ha ri exikolweni a ri xitsutsumi lexikulu swinene. Tatana Manganyi a tsakela ku yingisela tinsimu ni ku hlalela mintlangu ya xibakele na Wrestling.
KTC u siya nsati ku nga Hlamalani Eunice, vana, Khanyisa, Gina (u lovile), Amukelani na Makungu. Vatukulu va ntlhanu ku nga: Ntlakuso, Pfumelani, Mfanelo, Ntlharhi na Nhleko. Vamakwenu Hasani Wilson (u lovile), Hlengani Joe (u lovile), Mphephu Grace na Mzamani Glen.
Etlela hi ku rhula Magoda….Manganyi.
Ripindzi ro phasa homu na rhole!
